Бишкек, 19.02.26. /Кабар/. Күн мурун Түп районунун Шаты айылында №8 Д.Молдогазиев атындагы мектептин жаңы курулган имараты пайдаланууга берилди. Бул тууралуу Өзгөчө кырдаалдар министрлигинен билдиришти.
Маалыматка ылайык, билим уясы эки кабаттан туруп, 225 окуучуга ылайыкталган. Коопсуздукту сактоо максатында видеокамералар орнотулган. Жалпы 16 окуу классы, 8 даараткана, спорт залы, концерттик зал, ашкана, китепкана, медициналык кабинет, окуу куралдары, компьютер, изилдөө жүргүзүүгө керектүү аппараттар менен жабдылган физика, химия, информатика класстары бар.
Эң башкысы мектептин ар бир бөлмөсүндө аба желдетүү системасы менен катар резервдик электр генератору да бар. Бул электр жарыгы өчкөн учурда окуу процессин үзгүлтүксүз улантууга мүмкүнчүлүк берет. Имаратта майыптыгы балдар үчүн лифт, пандус каралган. Ошондой эле саркынды сууларды тазалоочу курулмалар (септиктер) салынган.
Имарат ӨКМ тарабынан ишке ашырылган ERIK долбоорунун алкагында Дүйнөлүк банктын каржылоосу менен курулду.
