Бишкек, 30.07.25. /Кабар/. Түп районунун Каркыра айылындагы Ж.Асылбаев атындагы жаңы мектеп быйыл пайдаланууга берилет.
Курулуш, архитектура жана турак жай-коммуналдык чарба мамлекеттик агенттигинен билдиришткендей, курулушу жүрүп жаткан жаңы мектеп 100 окуучуга ылайыкташкан.
Долбоорду ишке ашыруу 2023-жылы башталып, республикалык бюджеттин эсебинен каржыланып келет. Тендердик баасы 80 млн сомду түзөт.
Башкы план боюнча эки кабаттуу окуу корпус, өтмө галерея жана заманбап спорт залдан турат.
Мындан тышкары, мектепте лаборатория, компьютердик жана балдар, кыздардын эмгек класстары каралган.
Курулуш-монтаждоо иштери Турак жай-жарандык курулуш департаменти тарабынан көзөмөлдөнүүдө.
