Бишкек, 05.12.25 /Кабар/. Түп районундагы В. Кайкин атындагы орто мектеп 47 жылдан бери биринчи жолу капиталдык оңдоп-түзөөдөн өтүп жатат. Бул тууралуу Курулуш, архитектура жана турак жай-коммуналдык чарба министрлигинен билдиришти.
Күн мурун курулуш министри Нурдан Орунтаев оңдоодон өтүп жаткан мектеп менен таанышты.
Бүгүнкү күндө мектептин ичиндеги иштер бүткөрүлүп, жууп-тазалоо этабына жетти. Ал эми сырткы футбол талаасы толук жаңыланып, учурда мектептин аймагы көрктөндүрүлүүдө. Мындан тышкары, мектепке сырткы баскетбол жана волейбол талаасы салынды.
Курулуш иштери “Кыргызкурулуш” мамлекеттик ишканасы тарабынан аткарылып жатат. Капиталдык оңдоо иштерин 2025-жылдын аягына чейин толук бүткөрүү пландалууда.
Белгилей кетсек, мектеп 1978-жылы пайдаланууга берилип, андан бери косметикалык оңдоп-түзөө гана жүргүзүлүп келген. 2025-жылдын июнь айында республикалык бюджеттин эсебинен капиталдык оңдоо иштери башталган.
