Бишкек, 19.09.25. /Кабар/. Түп районунда бир нече унаа жолдорду асфальттоо иштери ийгиликтүү жыйынтыкталды. Бул тууралуу Транспорт жана коммуникациялар министрлигинен билдиришти.
Маалыматка ылайык, учурда Михайловка – Николаевка – Токтоян – Сары-Төлөгөй унаа жолунун 19-26 чакырымдар аралыгына асфальт төшөлүп, пайдаланууга берилди. Өткөн жылы бул жолдун 6,6 чакырымы асфальтталган.
Ошондой эле Каркыра – Турук – Сары-Жаз жолунун 13-16-чакырым аралыгы эки тараптуу асфальтталып бүткөрүлдү.
Мындан тышкары, Долон – Кош-Дөбө унаа жолундагы көпүрөнүн курулушу уланууда. Учурда тирɵɵчтɵрүн орнотуу үчүн жээктери бекемделүүдө.
Жол иштери №4 Жол тейлөө ишканасы тарабынан жүргүзүлдү. Азыркы тапта шагыл жолдорду жана жайлоого кеткен жолдорду убактылуу кароо, жаандан кийинки сүрүп-тегиздөө иштери жүрүүдө.
