Бишкек, 10.07.26. /Кабар/. Кыргызстанда 9-июлдан 12-июлга чейинки аралыкта Франциянын Куралдуу күчтөрүнүн эксперттер делегациясы жумушчу сапары менен жүрөт.
Коргоо министрлигинен билдиришкендей, сапардын алкагында чет өлкөлүк аскер адистери Кыргызстандын Куралдуу күчтөрүнүн тоо даярдыгынын өзгөчөлүктөрү менен таанышып, келечекте эки өлкөнүн Куралдуу күчтөрүнүн бөлүктөрү менен биргеликте тоо даярдыгы боюнча машыгууларды өткөрүү мүмкүнчүлүктөрүн үйрөнүшүүдө.
"Бул иш-чара Кыргызстан менен Франциянын ортосундагы эки тараптуу аскердик кызматташтыктын алкагында ишке ашырылууда. Анын негизги максаты – заманбап чакырыктар менен коркунучтарды эске алуу менен аскер кызматкерлерин тоо шартында даярдоо чөйрөсүндө өз ара аракеттенүүнү өнүктүрүү жана алдыңкы тажрыйба алмашуу болуп саналат", - деп айтылат маалыматта.
