Бишкек, 26.01.26. /Кабар/. Бүгүн Ош шаарынын мэри Жеңишбек Токторбаев Аскар Шакиров 22 даректе жайгашкан көп кабаттуу үйдүн жашоочулары менен жолугуп, алардын кайрылууларын укту.
Муниципалитеттен билдиришкендей, аталган көп кабаттуу үй «Эмаком» курулуш компаниясы тарабынан курулуп, пайдаланууга берилген. Бирок, узак убакыт бою курулушка байланыштуу документ иштери толук бүткөрүлбөй, 2025-жылдын октябрь айында гана аяктаган.
Ага карабастан, бүгүнкү күнгө чейин жашоочулар суу жана электр энергиясы үчүн коммерциялык тариф боюнча төлөм жүргүзүп келишкен.
Шаар мэри жашоочулардын маселелерин угуп, тиешелүү кызматтарга көйгөйлөрдү жеринде иликтеп чыгып, тез арада чечүү боюнча тапшырма берди.
