Бишкек, 12.08.26. /Кабар/. Токтогул шаарынын аймагында жол жээктеринде жана белгиленбеген жерлерде мыйзамсыз соода-сатык жүргүзүүгө жол бербөө максатында тиешелүү иштер жүргүзүлүүдө.
Шаардык мэриядан билдиришкендей, жол жээгинде уруксатсыз дарбыз жана башка айыл чарба продукцияларын сатып жаткан жарандарга карата Кыргыз Республикасынын Укук бузуулар жөнүндө кодексине ылайык протоколдор түзүлүп, белгиленген тартипте тиешелүү чаралар көрүлдү.
"Урматтуу шаар тургундары жана соода жүргүзгөн жарандар! Соода-сатыкты мыйзамда белгиленген тартипте, атайын бөлүнгөн жана уруксат берилген жерлерде жүргүзүүгө чакырабыз",-деп айтылат маалыматта.
Токтогул шаарынын мэриясы мыйзам талаптарын сактоого жана коомдук тартипти камсыз кылууга багытталган иштерди мындан ары да улантат.
