Бишкек, 27.04.26. /Кабар/. Токтогул суу сактагычын мыйзамсыз балык уулоочу куралдардан тазалоо боюнча масштабдуу рейд өттү.
Жаратылыш ресурстары, экология жана техникалык көзөмөл министрлигинен билдиришкендей, эки күндүк рейдде суудан 12 миң метр синтетикалык тор чыгарылды.
Мындай торлор экосистемага орду толгус зыян келтирип, балык запастарын жок кылат жана сууда сүзүүчү канаттуулар үчүн өлүмгө алып келүүчү тузакка айланат.
Биологиялык ар түрдүүлүктү сактоо жана Кыргызстандын суу ресурстарын коргоо боюнча мамлекеттик көзөмөлдү күчөтүүнүн алкагында, Экологиялык жана техникалык көзөмөл кызматы мындай рейддерди өлкөнүн бардык ири суу объекттеринде үзгүлтүксүз жүргүзүп келет.
