Бишкек, 10.11.25 /Кабар/. Бүгүн Токтогул районунда органикалык айыл чарбаны өнүктүрүү боюнча семинар өттү. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Маалыматка ылайык, анда райондун Кара-Күнгөй жана Ак-Тектир, Бел-Алды айылдарын органикалык аймакка өткөрүү маселеси каралды.
Иш-чарага тиешелүү жетекчилер катышып, катышуучуларга органикалык айыл чарбаны өнүктүрүүнүн мааниси, талаптары жана сертификациялоо жол-жоболору тууралуу кеңири маалымат берилди.
Адистер дыйкандарга органикалык өндүрүштүн артыкчылыктары, топурактын табигый түшүмдүүлүгүн сактоо жана экологиялык таза продукция өндүрүүнүн жолдору боюнча практикалык кеңештерди сунушташты.
Иш-чаранын жыйынтыгында катышуучулар органикалык аймак макамын алуу үчүн керектүү кадамдар жана документтер тууралуу түшүнүк алышып, мындан ары органикалык стандарттарга ылайык иш жүргүзүүгө даярдыгын билдиришти.
