Бишкек, 13.07.26. /Кабар/. Бүгүн, 13-июль күнү Токмок шаарындагы жаңы стадиондо анын пайдаланууга берилиши алдындагы кезектеги инспекция өткөрүлдү. Бул тууралуу Кыргыз футбол биримдигинен билдиришти.
Инспекцияга Кыргыз футбол биримдигинин президентинин кеңешчиси Тимур Курманов, биримдиктин башкы катчысы Медербек Сыдыков, Чүй облусунун футбол ассоциациясынын жетекчиси Рахат Тутуев, ошондой эле курулуш иштерине жооптуу уюмдардын өкүлдөрү катышты.
Көчмө жыйындын жүрүшүндө курулуш иштеринин акыркы этабы, аткарылган иштердин сапаты жана объектти пайдаланууга берүү алдындагы даярдык каралды. Ошондой эле курулушту өз мөөнөтүндө толук аяктоо жана стадиондун расмий ачылышын уюштурууга байланыштуу маселелер талкууланды.
Учурда стадиондогу курулуш иштери жыйынтыктоочу баскычта турат. Жаңы футболдук объекттин расмий ачылышы 2026-жылдын август айына пландалууда.
Заманбап талаптарга жооп берген жаңы стадион Токмок шаарында жана жалпы Чүй облусунда футболду өнүктүрүүгө, машыгууларды жана республикалык деңгээлдеги мелдештерди өткөрүүгө кеңири мүмкүнчүлүктөрдү түзөт.
