Бишкек, 20.05.25. /Кабар/. Тоң районунда жайкы туристтик сезондун башталышына байланыштуу алдын алуу иштери жүрүүдө. Бул тууралуу Ысык-Көл облустук ички иштер башкармалыгынан билдиришти.
Милиция кызматкерлери тарабынан эс алуучу жайларда жайкы туристтик сезондун башталышына байланыштуу алдын алуу жана түшүндүрүү иштери активдүү жүргүзүлүүдө.
Бул иш-чаралардын негизги максаты — жарандардын жана келген туристтердин коопсуздугун камсыз кылуу, ошондой эле эс алуучу жайларда тартипти сактоо жана мүмкүн болуучу тобокелдиктердин алдын алуу.
ИИМ кызматкерлери тарабынан төмөнкү иштер жүргүзүлдү:
- эс алуучулар менен профилактикалык маектешүү;
- коопсуз эс алуунун эрежелери боюнча түшүндүрүү;
- туристтик багыттарда жөө жана авто патрул кызматтарын уюштуруу;
- эс алуу жайларынын кызматкерлерине жана жергиликтүү тургундарга укуктук маалымат берүү.
Тоң РИИБдин коомдук коопсуздук кызматынын өкүлдөрү белгилешкендей, мындай алдын алуу иш-чаралары жай мезгилинде көп сандаган туристтерди кабыл алган аймактарда өзгөчө мааниге ээ. Бул ыкмалар коомдук тартипти сактоого, мыйзам бузууларды алдын алууга жана жарандар менен милициянын ортосундагы өз ара түшүнүшүүнү бекемдөөгө көмөк көрсөтөт.
Белгиленгендей, мындан ары дагы райондун аймагында түшүндүрүү иштери улантылат.
