Бишкек 05.08.25 /Кабар/. Ысык-Көл облусунун Тоң районунда балдарды мектепке чейинки билим берүү менен кеңири камтууга арналган жыйын өттү.
Агартуу министрлигинен билдиришкендей, иш-чарада 2025-жылдын аягына чейин райондогу балдарды бала бакчага камтуунун деңгээлин 60 пайызга жеткирүү максаты коюлду.
Жолугушууга Агартуу министрлигинин өкүлдөрү, акимдин орун басары Гүлбүбү Жашымбек кызы жана төрт айыл өкмөтүнүн башчылары катышты.
Министрликтин өкүлдөрү балдарды бала бакчага кабыл алуу процесси, анын артыкчылыктары жана бала бакчага барган балдардын сапаттуу билим алуу мүмкүнчүлүктөрү тууралуу маалымат беришти.
Өз кезегинде айыл өкмөт башчылары бала бакчалардын жетишсиздигин жоюу, жаңы орундарды түзүү жана инфраструктураны жакшыртуу багытында жүргүзүлүп жаткан иштерге токтолушту.
Акимдин орун басары Гүлбүбү Жашымбек кызы жыйында сүйлөп жатып, 2025-жылдын соңуна чейин Тоң районунда бала бакчаларга камтуунун деңгээли 60 пайыздан ашарын белгиледи.
