Бишкек, 24.09.25 /Кабар/. “Түндүк” электрондук кызматтар порталына жарандардын ден соолугун текшерүүгө багытталган “Өз ден соолугуңду текшер!” тиркемеси (Check-ир модулу) киргизилди. Бул тууралуу “Кабар” агенттигинде өткөн маалымат жыйында М.Миррахимов атындагы Улуттук кардиология жана терапия борборунун директору, медицина илимдеринин доктору жана профессор Талантбек Сооронбаев билдирди.
Тиркемеге төмөндөгү сегиз параметр киргизилди:
- Тамекини таштоо;
- Туура тамактануу;
- Кыймыл-аракетти кошуу;
- Салмакты текшерип туруу;
- Кан басымды текшерип туруу;
- Кандагы канттын деңгээлин билүү;
- Кандагы холестиринди текшерүү;
- Уйкуну көзөмөлгө алуу.
Талантбек Сооронбаевдин айтымында, тиркемеге киргизилген сегиз көргөзгүчтү алдын алуу менен ар бир жаран жүрөк оорусунун алдын алат. Андан сырткары, негизи эле оорулардан алыс болуп, узак жашай алат.
“Тиркемеге кирип ар бир кыргызстандык жаран ал жердеги суроолорго жооп берүү менен оңой эле өзүнүн жогоруда аталган сегиз көрсөткүчүн текшере алат. Ичинде аталган оорулардын алдын алуу, кандай кадамдарды жасоо керектиги тууралуу маалыматтар бар. Андан сырткары, жарандар тиркемедеги кошумча баскыч аркылуу дарыгерге да жазыла алышат”, -деди ал.
Бул тиркеме жүрөк-кан тамыр ооруларынын кооптуулугун алдын алуу максатында "Ыкчам кардиология" программасынын алкагында иштелип чыккан. Ошондой эле ал үй-бүлөлүк деңгээлде калктын маалымдуулугун жогорулатуу максатын көздөйт.
