Бишкек, 20.06.25. /Кабар/. Бишкек шаарынын мэри Айбек Жунушалиев Мыкан конушунун жашоочулары менен жумушчу жыйын өткөрүп, Түндүк айланма жолунун реконструкциялоо долбооруна байланыштуу актуалдуу маселелерди талкуулады.
Шаардык мэриядан билдиришкендей, долбоордун алкагында көчүрүлүүгө тийиш болгон 478 объектинин ичинен учурда 4 объект боюнча маселе ачык бойдон калууда.
Жолугушууда мэр Свердлов районунун акимине жарандардын жер жана турак жай маселелерин тез арада чечүүнүн жолдорун иштеп чыгууну тапшырды. Бул багытта жер тилкелерин алмаштыруу жана турак жайларды башка жерге көчүрүү сыяктуу альтернативалар каралууда.
Айбек Жунушалиев ири инфраструктуралык долбоорду ишке ашырууда жарандардын укуктары жана мыйзамдуу кызыкчылыктары сөзсүз түрдө эске алынышы керек экенин баса белгиледи.
Маалыматка ылайык, реконструкциялоо долбоору жалпы узундугу 33,4 чакырымды түзгөн жолду курууну камтыйт. 2025-жылы Алматы–Бишкек–Ташкент (6 км) жана Бишкек–Нарын–Торугарт (9,1 км) автожолдорунун айрым участокторунда жалпы 15 чакырым жол асфальтталышы пландалууда.
Долбоор аяктагандан кийин бул жол алты тилкеге чейин кеңейип, борбор калаанын жол өткөрүмдүүлүгү кыйла жогорулайт.
