Бишкек, 13.08.26. /Кабар/. Түрк мамлекеттер уюмунун (ТМУ) башкы катчысы Кубанычбек Өмүралиев Стамбулда Япониянын тышкы иштер министринин орун басары Арфия Эри менен жолукту.
Уюмдун маалыматына караганда, жолугушууда ТМУнун ишмердүүлүгү жана Түрк дүйнөсүндөгү аймактык кызматташтыктагы ролу талкууланды. Ошондой эле Азия менен Европаны байланыштырган Транскаспий эл аралык Чыгыш-Батыш Орто коридорунун мүмкүнчүлүктөрү каралды.
Тараптар соода жана инвестиция, энергетика, транспорт, санариптештирүү, инновациялар, жашыл трансформация, билим берүү жана элдер аралык байланыштар боюнча кызматташтыкты кеңейтүү мүмкүнчүлүктөрүн талкуулашты.
Япония тарап Түрк дүйнөсү менен өз ара аракеттенүүнү мындан ары чыңдоого кызыкдар экенин билдирди. Жолугушуунун жыйынтыгында ТМУ менен Япониянын, анын ичинде ТМУ+ форматынын алкагындагы кызматташтыгын өнүктүрүү боюнча байланыштарды улантуу макулдашылды.
