Бишкек, 10.07.25. /Кабар/. Күн мурун президенттин Жалал-Абад облусундагы өкүлү Тилек Текебаев Базар-Коргон районундагы инфраструктуралык жана социалдык багыттагы бир катар иштер менен таанышты.
Өкүлчүлүктөн билдиришкендей, ал кыдыруу учурунда Акман айыл аймагындагы Жараке-Бай-Мундуз айылдарын бириктирген 6 чакырымдык ички жолдун оңдоо жана асфальттоо жумуштарын көрүп чыкты.
Мындан тышкары, өкүл Карача айылында республикалык бюджеттин каржылоосу менен №8 Ж.Сулайманкулов атындагы 275 орундуу жаңы орто мектебинин курулуш иштерин көрүп чыгып, сапатын жакшыртуу боюнча бир катар кемчиликтерди белгилеп, жөнгө салуу тапшырмасын берди.
Тилек Текебаев ошондой эле Базар-Коргон шаарындагы Ү. Сыдыков атындагы эс алуу багын реконструкциялоо жумуштары менен таанышып, А.Текебаев көчөсүндө чыгарылган скважинаны көрдү.
Облус башчысы Биринчи Май айыл аймагындагы жаңгак тоннели, жаңы отургузулган жаңгак көчөттөрү, орнотулган түнкү жарыктандыруу жана туристтик инфраструктуранын өнүгүшүнө багытталган арка сыяктуу объекттерди жеринде көрүп чыкты. Өкүл тарабынан аймакка келген эс алуучулар үчүн атайын сүрөткө түшүү аянтчасын уюштуруу тапшырмасы берилди.
Ошондой эле ал буга чейин Арстанбап-Ата айыл аймагынын борбордук бөлүгүн иретке келтирүү, мыйзамсыз курулуштарды буздуруу, тургундарга жана эс алуучуларга ыңгайлуу шарттарды түзүү багытында берилген тапшырмалардын аткарылышын көрүп чыгып, кошумча милдеттемелерди койду.
