Бишкек, 02.04.25. /Кабар/. Президенттин Жалал-Абад облусундагы өкүлү Тилек Текебаев Ала-Бука районунда "Мурас" базарындагы кардарларга жана сатуучуларга түзүлгөн шарттар менен таанышты.
Өкүлчүлүктөн билдиришкендей, ошондой эле ал Аксы, Ала-Бука жана Чаткал районунун тургундарын тейлеген мал базардагы түзүлгөн шарттарды көрдү.
Тилек Текебаев калктын басымдуу бөлүгү мал чарбачылыгы менен алектенээрин айтып, базарларда тиешелүү шарттар түзүлүүсү керектигин белгиледи. Анда архитектуралык көрүнүш, коопсуздук, санитардык эрежелерди так сактоого чакырып, жергиликтүү бийликке бир катар тапшырмаларды берди.
Мындан тышкары, облус башчысы жеке ишкер тарабынан райондогу Орто-Токой суу сактагычынын жээгине курулуп жаткан "Айыл кечтери" этно-комплексиндеги жумуштар менен таанышты.
