Бишкек, 16.01.26. /Кабар/. Бүгүнкү күндө Кыргызстанда тигүүчүлөр үчүн эң ыңгайлуу шарттар түзүлгөн. Бул тууралуу Соода-өнөр жай палатасынын президенти Темир Сариев тигүү тармагындагы, ишке орноштуруу жана экономика чөйрөсүндөгү учурдагы кырдаал тууралуу маалымат угулган "Ала-Тоо" депутаттык тобунун жыйынында билдирди.
"Биз Өзбекстан менен Казакстанда болуп, ишкерлер менен баарлашканыбызда, алар кыргыз өндүрүүчүлөрү аларды рыноктон сүрүп чыгарып жатканына даттанышат. Россиялык сатып алуучулар да биздин тигүүчүлөрдүн деңгээли 3-5 эсе жогору экенин, ал эми продукциянын сапаты европалык стандарттарга жооп берерин белгилешет", - деди ал.
Сариев Кыргызстан арзан продукцияны массалык тигүүдөн алыстап, кымбатыраак баа сегментине өтүшү керектигин баса белгиледи.
"Мен мурда эле майка же ич кийим эмес, кымбатыраак кийимдерди тигүү керектигин айткам", - деди ал.
Мындан тышкары, Соода-өнөр жай палатасынын башчысы Евразия экономикалык биримдигинин алкагындагы иштерге токтолду. Ал коомчулукта айрым депутаттар жана блогерлер тарабынан көп учурда туура эмес билдирүүлөр жасалып жатканын белгиледи.
"Биздин продукцияны сатуунун негизги рыногу — бул Россия, экспорттун дээрлик 100 пайызы ошол жакка кетет. Ошондуктан тигүү тармагына өзгөчө аяр мамиле кылуу шарт", - деп белгиледи Сариев.
Ал ошондой эле экономикалык кыйынчылыктар жана Россиянын бюджетине түшкөн кирешенин азайышынан улам товарларды алып кирүүгө болгон талаптар катаалдашканын эске салды.
"Эгер мурун көптөгөн маселелер оңой чечилсе, азыр катуу тартип, анын ичинде КНС жана документтер боюнча талаптар киргизилди. Биз өзүбүз тартипке келип, товарларды жана коштоочу документтерди туура толтурушубуз керек, ошондо өтүү жеңил болот. Рынок өзгөрүүдө, саясат башкача болуп калды", - деди ал.
Анын айтымында, бүгүнкү күндө сатуунун 90 пайызы маркетплейстерге өтүп жатат жана кыргыз өндүрүүчүлөрү жаңы шарттарда иштөөгө даяр болушу зарыл.
