Бишкек, 19.05.26. /Кабар/. Бүгүн президенттин Жалал-Абад облусундагы өкүлү Тилек Текебаев Сузак районунун Сузак айыл аймагынын тургундары менен жолукту.
Өкүлчүлүктөн билдиришкендей, жолугушууга облустук жана райондук мекеме-ишканалардын жетекчилери, ошондой эле жергиликтүү тургундар катышып, жалпы 366 адам болду.
Жолугушуунун жүрүшүндө тургундар тарабынан бир катар социалдык жана инфраструктуралык көйгөйлөр көтөрүлдү.
Тактап айтканда, Сузак районунун борбордук бөлүгүндө курулуп жаткан муниципалдык базардагы курулуш иштеринин солгун жүрүп жатканы, жер тилкелери жана турак жайларга байланышкан укуктук маселелер, таза суу менен камсыз кылуу, ирригация жол коопсуздугун камсыз кылуу көйгөйлөрү айтылды. Мындан сырткары, жарандар жеке укуктук маселелери боюнча да кайрылышты.
Жалпысынан 61 жаран тарабынан 92 маселе көтөрүлдү. Облус башчысы Тилек Текебаев ар бир кайрылууну угуп, айрым маселелерди жеринде чечүүгө көмөк көрсөттү. Ошондой эле тиешелүү облустук жана райондук мекеме-ишканалардын жетекчилерине көтөрүлгөн маселелерди мыйзам чегинде карап чыгып, чечүү боюнча тиешелүү тапшырмаларды берди.
