Бишкек, 25.07.25. /Кабар/. Тажикстандын журналисттерден жана блогерлерден турган делегациясы “Ала-Арча” жаратылыш паркына барды.
Анын алкагында алар туристтик каттамдар менен таанышып, тоо койнундагы кооз жаратылышта эс алуу менен Кыргызстанда экотуризмди өнүктүрүүнүн келечеги тууралуу маалымат алышты.
"Бул жердин кооздугу таң калтырат! Биздин материалдар Тажикстандагы көрүүчүлөрдүн кызыгуусун жаратып, аларды Кыргызстанга келүүгө шыктандырат деп ишенебиз", - деп айтты делегация мүчөлөрүнүн бири.
Сапар Кыргызстандын президенти Садыр Жапаровдун тапшырмасы боюнча мамлекет башчысынын басма сөз катчысы Аскат Алагөзов тарабынан маалыматтык чөйрөдөгү эки тараптуу кызматташтыкты өнүктүрүүнүн алкагында уюштурулган.
Белгилей кетсек, мындай сапар жөн гана кесиптик алмашуу эмес. Бул биздин эки элдин ортосундагы өз ара түшүнүшүүнү, достукту жана ишенимди бекемдөөгө карай ташталган кадам болуп саналат.
Белгилей кетсек, бул жолугушуу Кыргызстан менен Тажикстандын президенттеринин сүйлөшүүлөрүнүн жүрүшүндө жетишилген макулдашуулардын натыйжасы экенин айта кетүү керек. Медиа чөйрөнүн өкүлдөрүнүн ортосундагы түз байланыш өз ара түшүнүшүүнү бекемдеп, окуяларды так жана ачык чагылдырууга багытталган биргелешкен долбоорлордун пайдубалын түптөйт деп күтүлүүдө.
Эске салсак, мындай сапарлар жакшы салт болуп калды. Былтыр Кыргызстан Өзбекстан менен Казакстандын ЖМК өкүлдөрүн кабыл алса, кыргызстандык журналисттер аталган өлкөлөргө барышкан. Бул жолугушуулар Борбор Азиянын медиа өнөктөштүгүн өнүктүрүүдө жогорку натыйжалуулукту көрсөтүүдө.
