Бишкек, 25.07.25. /Кабар/. Бүгүн Тажикстандын журналисттерден жана блогерлерден турган делегациясы Кыргыз улуттук “Кабар” маалымат агенттигинде жана УТРКнын Ала-Тоо 24 телеканалында болушту.
Анын алкагында ЖМК жетекчилери, башкы редакторлор жана журналисттер менен жолугушуулар өткөрүлдү. Анда медианы өнүктүрүүнүн заманбап тенденциялары, коомдук пикирди калыптандырууда телевидениенин жана санариптик платформалардын ролу, ошондой эле тажрыйба алмашуу жана кызматташуу келечеги талкууланды.
"Бул сапар бизге кыргызстандык кесиптештерибиз жаңы форматта жана заманбап технологиялар менен кандай иштеп жатканын көрүү үчүн мүмкүнчүлүк түзүп жатат. Биз бул тажрыйбаны өздөштүрүп, Тажикстанда жаңы идеяларды ишке ашыргыбыз келет", - деди делегация мүчөлөрүнүн бири.
Кабыл алган тарап баса белгилегендей, кесиптик байланыштарды чыңдоо үчүн мындай жолугушуулар абдан маанилүү.
"Биз Тажикстандан келген кесиптештерди Бишкекте көргөнүбүзгө кубанычтабыз. Мындай жолугушуулар маалыматтарды жана пикирлерди алмашууга гана эмес, бири-бирин жакшыраак түшүнүүгө да жардам берет. Журналисттер түз баарлашканда окурмандарыбыз үчүн объективдүү жана чыныгы көрүнүштү көрсөтө алат", - деди УТРКнын башкы директорунун орун басары Улан Сатиев.
"Биз Тажикстанда ЖМКлар кандай иштерине, коом үчүн кандай темалар актуалдуу экенин билүүгө кызыкдарбыз. Бул бейформал баарлашуу бизге биргелешкен долбоорлорду түзүүгө жана элдердин ортосундагы достукту чыңдоого жардам берет", - деди "Кабар" маалымат агенттигинин директорунун орун басары Халида Эргешева.
Белгилей кетсек, бул жолугушуу Кыргызстан менен Тажикстандын президенттеринин сүйлөшүүлөрүнүн жүрүшүндө жетишилген макулдашуулардын натыйжасы экенин айта кетүү керек. Медиа чөйрөнүн өкүлдөрүнүн ортосундагы түз байланыш өз ара түшүнүшүүнү бекемдеп, окуяларды так жана ачык чагылдырууга багытталган биргелешкен долбоорлордун пайдубалын түптөйт деп күтүлүүдө.
Эске салсак, мындай сапарлар жакшы салт болуп калды. Былтыр Кыргызстан Өзбекстан менен Казакстандын ЖМК өкүлдөрүн кабыл алса, кыргызстандык журналисттер аталган өлкөлөргө барышкан. Бул жолугушуулар Борбор Азиянын медиа өнөктөштүгүн өнүктүрүүдө жогорку натыйжалуулукту көрсөттү.
