Бишкек, 30.10.25. /Кабар/. Министрлер кабинети “Тамчы” каржылык-инвестициялык аймагын атайын жеңилдик режими менен ишке киргизүүнү пландоодо. Бул тууралуу министрлер кабинетинин төрагасынын орун басары Данияр Амангелдиев Улуттук өнүктүрүү форуму – 2030 иш-чарасында билдирди.
Анын айтымында, аймакты түзүү инвестицияларды тартууга, финансы секторун өнүктүрүүгө жана инновациялык экосистеманы түзүүгө багытталган.
"Улуттук өнүктүрүү программасынын алкагында креативдик индустрия үчүн улуттук венчурдук фондду түзүү, жаштардын ишкердигин жана инновациялык стартаптарды колдоо жана санариптик каржылоо механизмдерин киргизүү да пландалууда", - деп белгиледи Амангелдиев.
Ал белгилегендей, насыя берүү инструменттерин кеңейтүү жана заманбап финансылык инфраструктураны өнүктүрүү негизги артыкчылыктар бойдон кала берет:
- факторинг, камсыздандыруу жана баалуу кагаздар рынокторун өнүктүрүү;
- ипотекалык насыялардын көлөмүн көбөйтүү жана ипотекалык баалуу кагаздар рыногун түзүү;
- лизинг механизмдерин жана санариптик ишеним инфраструктурасын өнүктүрүү;
- банктык жана салыктык системанын маалыматтарын интеграциялоо;
- улуттук стейблкойндерди жана виртуалдык активдерди ишке ашыруу;
- фондулук рынокту өнүктүрүү жана эл аралык баалуу кагаздар аянтчаларына чыгуу.
Мындан тышкары, Амангелдиев кошумчалагандай, минкаб аймактарды жана инфраструктураны өнүктүрүү боюнча ишти улантып жатат.
“Аймактык борборлорду өнүктүрүүгө, Баткен-Сити шаары сыяктуу мегадолбоорлорду колдоого, продукцияны экспорттоо үчүн логистикалык борборлорду курууга жана тоо-кен тармагынын ресурстарын натыйжалуу пайдаланууга өзгөчө көңүл бурулууда”, - деди ал.
“Тамчы” каржылык жана инвестициялык аймагын түзүү Кыргызстанды Борбор Азиядагы инновациялык борборго, экспортко жана туруктуу өнүгүүгө багытталган атаандаштыкка жөндөмдүү инвестициялык борборго айландыруу стратегиясынын бир бөлүгү катары каралат.
