Бишкек, 28.06.25. /Кабар/. Такыр-Төр көлүнүн жырылышынан кийин кырдаал турукташып, Төмөнкү-Серафимовка интернатынын кызмат алуучулары кайра кайтарылды. Бул тууралуу Эмгек, социалдык камсыздоо жана миграция министрлигинен билдиришти.
Маалыматка ылайык, Такыр-Төр көлүнүн жырылышынан улам жаралган өзгөчө кырдаалга байланыштуу Төмөнкү-Серафимовский карылар жана майыптуулугу бар жарандар үчүн социалдык стационардык мекемесинин бардык кызмат алуучулары ыкчам түрдө эвакуацияланган.
Эвакуацияланган жарандар убактылуу мектептин имаратына жайгаштырылып, аларга тамак-аш, медициналык жардам көрсөтүлгөн.
Окуя болгон жерге эмгек министри Равшанбек Сабиров барып, эвакуация иштерин көзөмөлдөдү.
"Суунун агымы кыйла азайды. Жакынкы убактарда кырдаал толугу менен турукташат деп күтүп жатабыз. Бардык жарандар зарыл болгон жардамдарды алышты, жабыр тарткандар жок", — деп белгиледи министр.
Белгилей кетсек, күн мурун Такыр-Төр көлү жырылып, Алмалуу, Тоолуу Серафимовка жана Төмөнкү Серафимовка айылдарынан жалпы 950 адам эвакуацияланган.
