Бишкек, 18.10.25 /Кабар/. Кыргыз Республикасынын эл артисти, актёр, манасчы, акын жана дастанчы Табылды Актановдун 75 жылдык мааракесине арналган төкмө акындардын республикалык айтышы өттү. Бул тууралуу Маданият, маалымат жана жаштар саясаты министрлигинен билдиришти.
Маалыматка ылайык, баш байгени төкмө акын Элмирбек Иманалиев жеңди. 1-орунду Кутман Садыбакасов, 2-орунду Темирбек Матыбаев ээлесе, 3-орунду Арген Биймырза уулу алды.
Ошондой эле Жылдызбек Төрөканов жана Тынчтыкбек Эсенбай уулу атайын сыйлыктардын ээси болушту.
Белгилей кетсек, III даражадагы "Манас" орденинин ээси Табылды Актанов 1949-жылы 12-мартта Нарын районуна караштуу Өрнөк айылында жарык дүйнөгө келген. Ал манасчы Тыныбек Жапый уулунун небереси, ак таңдай акын Актан Тыныбековдун уулу. Бир нече пьесалардын автору. Учурда таланттуу инсан Т.Абдумомунов атындагы Кыргыз улуттук академиялык драма театрында эмгектенет.
