Бишкек, 17.12.25. /Кабар/. Жети-Өгүз районунун Даркан айылында ак куунун баласы куткарылды. Бул тууралуу Ысык-Көл облустук милициясынан билдиришти.
Маалыматка караганда, 16-декабрда жергиликтүү тургун Бектемир Бактыбек уулу көл жээгинде ооруп жаткан ак куунун баласын таап алган. Ал өз убагында туристтик-экологиялык милиция кызматына кабар берип, канаттууну кызматкерлерге өткөрүп берген.
Кийин ак куунун баласы коргоо жана калыбына келтирүү максатында Каракол шаарындагы "Бугу-Эне" зоопаркына өткөрүлүп берилген.
