Бишкек, 12.05.26. /Кабар/. Бүгүн президенттин Жалал-Абад облусундагы өкүлү Тилек Текебаев Сузак районунун Багыш айыл аймагынын тургундары менен жолукту.
Өкүлчүлүктөн билдиришкендей, жолугушууга жалпы 320дан ашуун тургун катышып, 55 жаран тарабынан 111 маселе көтөрүлдү.
Иш-чарага облустук жана райондук мекеме-ишканалардын жетекчилери, ошондой эле жергиликтүү бийлик өкүлдөрү катышты. Жолугушуу 5 саатка жакын уланып, тургундардын көйгөйлөрү жана суроо-талаптары кеңири талкууланды.
Тургундар тарабынан негизинен таза суу, турак жай, жер тилкелери, ички жолдор, мектеп жана бала бакча куруу, социалдык колдоо жана жөлөк пул маселелери көтөрүлдү. Ошондой эле жарандар жеке укуктук көйгөйлөрү боюнча көйгөйлөрүн айтышты.
Мындан тышкары, Кытай – Кыргызстан – Өзбекстан темир жолунун курулушунун алкагында турак жайларга жана үлүштүк жерлерге кенемте төлөө маселеси көтөрүлүп, тургундар бул багыттагы түшүндүрүү иштерин күчөтүү зарылдыгын белгилешти. Ошондой эле темир жол жана аэропорт тармагына адистерди даярдоо, жаштарды кесиптик окутуу жана ички коммуникациялык маселелери көтөрүлдү.
Облус башчысы көтөрүлгөн ар бир маселе көзөмөлгө алынарын белгилеп, тиешелүү жетекчилерге тапшырмаларды берди. Айрым маселелер жеринде чечилип, кошумча тактоону талап кылган көйгөйлөр объективдүү каралып, мыйзам чегинде чечүү жолдору каралаарын белгиледи.
