Бишкек, 19.08.2025. /Кабар/. Жалал-Абад облусунун Сузак районунда жаңы суу сактагыч куруу пландалууда. Бул тууралуу Суу ресурстары, айыл чарба жана кайра иштетүү өнөр жай министрлигинен билдиришти.
Суу ресурстары кызматынын жетекчилиги Жалал-Абад облусуна иш сапар менен барып, бардык райондорду кыдырып, суу чарба объектилеринин ишмердүүлүгү жана курулуп жаткан жаңы долбоорлор менен таанышты.
Анда Сузак районундагы жаңы ири долбоор – көлөмү 17 млн м³ суу топтой турган сезондук бассейн (БСР) куруу планы талкууланды. Бул бассейн ишке берилсе Көк-Арт өрөөнүндөгү 19 284 гектар айдоо аянтындагы дыйкандар сугат суу менен туруктуу камсыз болуп, түшүмдүүлүк жогорулайт жана райондун социалдык-экономикалык өнүгүүсүнө чоң салым кошулат.
