Бишкек, 06.02.26. /Кабар/. Сузак – Каду жолундагы кемчиликтер подрядчынын эсебинен жоюлат. Бул тууралуу Транспорт жана коммуникациялар министрлигинен билдиришти.
Ведомстводон белгилешкендей, социалдык тармактарга жарыяланган жол аталган унаа жолдун 0-2 чакырым аралыгы.
"Учурда бул тилкеде кемчиликтерди жоюу иштери жүргүзүлүп жатат. Аталган участокко өткөн жылдын сентябрь айында асфальт төшөлгөн. Жол подрядчы компаниянын кепилдик мөөнөтүндө турат. Ошондуктан бардык оңдоо жана калыбына келтирүү иштери подрядчынын эсебинен аткарылат. Жол толук талапка ылайык келтирилгенден кийин гана кабыл алынат", - деп айтылат маалыматта.
Белгилей кетсек, бүгүн министрликтин 2025-жылдын жыйынтыгы боюнча өткөн кеңешмеде министр Абсаттар Сыргабаев аталган жолдогу кемчиликтер үчүн тиешелүү жетекчилерге эскертүү берди.
