Бишкек, 05.08.26 /Кабар/. Күн мурун министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Эрлист Акунбеков Кытайдын Кыргызстандагы элчиси Лю Цзянпин менен жолукту.
Ведомстводон маалымдашкандай, жолугушууда тараптар Айыл чарба министрлигине атайын техника жеткирүү боюнча келишимге кол коюшту.
"Кытайдын гранттык жардамынын алкагында жалпы баасы 148,9 млн юанды түзгөн 370 атайын техника берилет. Алар ирригациялык каналдарды механикалаштырылган тазалоо иштеринде колдонулат", - деп айтылат маалыматта.
Техникалар өлкө боюнча Суу ресурстары кызматынын 7 облустук жана 40 райондук суу чарба башкармалыгына бөлүштүрүлүп, ирригациялык инфраструктураны тейлөөнүн натыйжалуулугун арттырууга жана айыл чарба жерлерин суу менен камсыздоону жакшыртууга өбөлгө түзөрү белгиленди.
