Бишкек, 25.03.26. /Кабар/. Ош шаарындагы Сулайман-Тоону айланта веложол жана жөө жүргүнчүлөр үчүн тротуар курулушу мүмкүн. Бул тууралуу мэриядан билдиришти.
Маалыматка ылайык, бүгүн мэр Жанарбек Акаев маданият, маалымат жана жаштар саясаты министри Мирбек Мамбеталиев менен жолугуп, анда "Сулайман-Тоо" улуттук тарыхый-археологиялык музей комплексин реконструкциялоо боюнча долбоордун презентациясы тааныштырылды.
Мэр аталган долбоорду ишке ашырууда чечкиндүү кадамдар керектигин белгилеп, веложол жана жөө жүргүнчүлөр үчүн тротуар курууну сунуштады.
Долбоорго ылайык Сулайман-Тоонун жолдору, тепкичтери, дарбазалары жана музейлердин ичи, сырты толук реконструкцияланат. Долбоор жалпы 12 бөлүктөн турат жана 3 этап менен ишке ашырылып, Дүйнөлүк банк тарабынан каржыланат.
Ошондой эле жыйында Алымбек датка курдурган Ак медресени калыбына келтирүү жана көрүстөндөрдү иретке келтирүү жумуштарын ишке ашыруу маселелери каралды.
