Бишкек, 27.07.26. /Кабар/. Курулуш министрлиги тарабынан Тоң районунун Кара-Талаа айылында 275 орундуу заманбап жаңы мектеп салынды.
Курулуш министрлигинен билдиришкендей, объекттин курулушу 2024-жылдын октябрь айында башталып, бүгүнкү күндө курулуш дээрлик аяктап, ичин сырдоо, тазалоо жумуштары аткарылууда.
Долбоор республикалык бюджеттин эсебинен каржыланып, жалпы наркы 236 миллион сомду түзөт.
Жаңы мектеп эки кабаттуу, үч блоктон турат. Анда заманбап окуу класстары, лаборатория, китепкана, ашкана, жыйындар залы, эмгекке үйрөтүү кабинеттери жана спорт залы каралган. Имараттын жалпы аянты 2980 чарчы метр. Мындан тышкары, мектептин аймагында жайкы футбол аянтчасы курулган.
