Бишкек, 09.10.25 /Кабар/. Күн мурун Сокулук районунун жаңы спорт комплексинин салтанаттуу ачылыш аземи өтүп, ага Кыргыз футбол биримдигинин президенти Камчыбек Ташиев катышты.
КФБ жетекчиси Сокулук районунун тургундарын жаңы стадион менен куттуктап, эми бул жерде футболдук беттештер, балбандардын таймаштары, маданий иш-чаралар жана элдик майрамдар өтүп турарын билдирди.
"Биздин максат — ар бир райондо спорттук инфраструктураны өнүктүрүү, жаштарга мүмкүнчүлүк түзүү, жана Кыргызстандын даңкын дүйнөгө чыгаруу", - деп белгиледи ал өз сөзүндө.
Салтанаттуу ачылыш аземинин алкагында кыргыз эстрада жылдыздарынын катышуусундагы концерт тартууланып, ачылыш азем КР Улуттук лигасынын кубогу үчүн финалдык "Семетей" (Кызыл-Кыя) - "Легенда" (Көк-Жаңгак) клубдарынын беттеши менен уланды.
Маалымат үчүн: Мурдагы стадион 1962-жылы курулуп, эскилиги жеткендиктен 2024-жылы реконструкцияга берилген. Спорт комплекске караштуу аймактын жалпы аянты 1,5 гектарды түзөт. Заманбап талаптарга жооп берген стадиондун трибуналары 2 200 көрүүчүгө ылайыкталган.
Стадиондо кийим алмаштыруучу бөлмө, мелдештерди өткөрүү үчүн бир нече функционалдык жана административдик бөлмөлөр, VIP-коноктор, медиа өкүлдөрү, ТВ адистери, беттештин расмий өкүлдөрү жана калыстар үчүн жана VAR-системасы үчүн бөлмөлөр жасалды.
Стадионду негизги оюн талаасы жасалма чөптүү болду. Ал эми стадиондун өзү жарык берүүчү заманбап шам-чырактар менен жабдылып, футболдук беттештерди жана иш-чараларды кечки убакытта өткөрүүгө шарт түздү.
Спорт комплекстин аймагында стадиондон сырткары футзал аянтчасы жана күрөш машыгуу залы орун алды.
Курулуш иштери Курулуш, архитектура жана турак жай-коммуналдык чарба министрлиги тарабынан ишке ашырылды.
