Бишкек, 21.03.26. /Кабар/. Күн мурун Кыргыз улуттук "Манас" театрында Нооруз майрамына арналган иш-чара өттү. Бул тууралуу Маданият, маалымат жана жаштар саясаты министрлигинен билдиришти.
Ага жергиликтүү тургундар, театр кызматкерлери, манасчылар, дастанчылар, жаш акындар жана "Аруу Нур" тобунун апалары катышты.
Иш-чарада "Манас" айтылып, акындар айтышып, улуттук оюндар менен коштолгон көркөм көрсөтүүлөр уюштурулду. Ошондой эле коноктор үчүн сүмөлөк жасалып, көжө бышырылды.
"Аруу Нур" тобунун апалары сүмөлөк жана көжө жасоо менен алектенсе, театрдын өнөрпоздору келген конокторго ыр-күүлөрү менен майрамдык маанай тартуулашты. Мындан тышкары, "Көйкашка" коомдук фондунун ыктыярчылары иш-чаранын жогорку деңгээлде өтүшүнө көмөк көрсөтүп, уюштуруу иштерине активдүү катышты.
Иш-чара Нооруздун улуттук маанисин жана салттарын сактоо, коомчулукту биримдикке жана маданий баалуулуктарга шыктандыруу максатында уюштурулду.
