Бишкек, 03.03.26. /Кабар/. Ош облустар аралык бириккен клиникалык ооруканасынын төрөт стационарында үч эм жарык дүйнөгө келди. Бул тууралуу ооруканадан билдиришти.
Өзгөн районунун Мырза-Аке айылынын 22 жаштагы тургуну Мавлюда Бердигулова 20-февраль күнү көз жарган. Ымыркайлардын салмагы 1800, 2220 жана 2320 граммды түзүп, учурда ден соолуктары жакшы. Бул үй-бүлөнүн үч эмге чейин бир кызы болгон.
Оорукананын директору Атабек Жумалиев эне жана ымыркайлардан кабар алып, белек-бечкек жана өз эсебинен 5000 сом сүйүнчү акча тапшырды.
Белгилей кетсек, бул 2026-жылдын башынан бери аталган ооруканада төрөлгөн алгачкы үч эм. Эне жана кыздар эртең, 4-март күнү үйүнө чыгарылат.
Маалымат үчүн: Ош облустар аралык ооруканасынын төрөт стационары 2026-жылдын январь айында 88 млн сомго капиталдык оңдоодон өткөрүлүп, пайдаланууга берилген.
