Бишкек, 25.09.25./Кабар/. Күн мурун Кытайдын Сиань шаарында экономика жана коммерция министринин орун басары Султан Ахматов Шэньси провинциясынын ишкер чөйрөсүнүн өкүлдөрү менен жолугушту.
Ведомстводон маалымдашкандай, жолугушуу Кыргызстандын Кытайдагы Соода өкүлчүлүгү тарабынан уюштурулду.
Анын алкагында Соода өкүлчүлүк Кыргызстандын инвестициялык потенциалын тааныштырып, чет өлкөлүк инвестицияларды тартууга жана биргелешкен долбоорлорду ишке ашырууга жагымдуу шарттар түзүлгөнүн баса белгиледи.
Туризмди өнүктүрүүнү колдоо фондунун өкүлдөрү өлкөнүн туристтик мүмкүнчүлүктөрүн жана бул тармактагы инвестициялык демилгелерди сунушташты.
Жолугушууда өзгөчө көңүл каржылык кызматташтык маселелерине бурулду. "Мамлекеттик финансылык холдингдин" башкармалыгынын төрагасы Элдияр Доолбеков уюмдун ишмердүүлүгү боюнча маалымат берип, "Сиань финансылык холдинги" менен кызматташуу жөнүндө меморандумга кол койду.
Мындан тышкары, кыргыз жана кытай компанияларынын ортосунда өз ара пайдалуу кызматташтыкты кеңейтүүгө жана Кыргызстан менен Шэньси провинциясынын ортосундагы экономикалык байланыштарды чыңдоого, жаңы мүмкүнчүлүктөрдү ачууга багытталган туризм жана соода тармактарында бир катар келишимдер да кабыл алынды.
