Бишкек, 27.07.26. /Кабар/. Бишкекте Кыргызстандын Шанхай кызматташтык уюмундагы (ШКУ) төрагалыгынын алкагында өткөн ШКУга мүчө мамлекеттердин жалпыга маалымдоо каражаттары жана аналитикалык борборлорунун форуму өз ишин жыйынтыктады.
Кыргыз улуттук “Кабар” маалымат агенттиги жана Кытайдын Синьхуа маалымат агенттиги менен биргеликте уюштурулган бул форум “ШКУ жаңы доордо: өз ара түшүнүшүүдөн практикалык кызматташтыкка карай” урааны астында өттү.
Ага ШКУга мүчө мамлекеттерден, байкоочу өлкөлөрдөн жана өнөктөш уюмдардан 26 өлкөнүн 250гө жакын өкүлү катышты. Алардын арасында улуттук маалымат агенттиктеринин жетекчилери, башкы редакторлор, ЖМК өкүлдөрү, аналитикалык борборлордун, илимий мекемелердин, мамлекеттик органдардын жана эл аралык уюмдардын өкүлдөрү болду.
Форумдун жүрүшүндө катышуучулар мамлекеттер ортосундагы өз ара ишенимди бекемдөөдө жалпыга маалымдоо каражаттарынын жана аналитикалык борборлордун ролун, маалыматтык кызматташтыкты өнүктүрүү маселелерин талкуулашты.
Ошондой эле жалган маалыматтарга каршы күрөшүү, медианын санариптик трансформациясы, жасалма интеллекттин мүмкүнчүлүктөрү, гуманитардык жана экономикалык байланыштарды кеңейтүү багыттары боюнча пикир алышты.
Пленардык жыйындын алкагында соода-экономикалык кызматташтык, инфраструктуралык байланыштарды өнүктүрүү, жашыл өнүгүү, маданий-гуманитардык алака, цивилизациялар аралык диалог жана жаңы технологиялардын ролу боюнча баяндамалар жасалды.
Катышуучулар ШКУ алкагында маалыматтык жана эксперттик кызматташтыкты күчөтүүнүн маанилүүлүгүн белгилеп, ЖМКлар менен аналитикалык борборлордун ортосундагы байланыштарды кеңейтүүгө багытталган биргелешкен демилгелерди сунушташты.
Форум ШКУ өлкөлөрүнүн ортосундагы өз ара түшүнүшүүнү тереңдетүүгө, ишенимди бекемдөөгө жана практикалык кызматташтыкты кеңейтүүгө багытталган маанилүү аянтча болуп калды.
