Бишкек, 02.10.26. /Кабар/. Башкы прокурор Мыктыбек Бектурганов 1-октябрда Казань шаарында өткөн Шанхай кызматташтык уюмуна (ШКУ) мүчө мамлекеттердин башкы прокурорлорунун 24-жыйынына катышты.
Башкы көзөмөл органынан билдиришкендей, жыйынга ШКУга мүчө мамлекеттердин прокуратура органдарынын жетекчилери, ошондой эле уюмдун байкоочу жана диалог боюнча өнөктөш өлкөлөрүнүн өкүлдөрү катышты.
Жолугушууда салттуу үй-бүлөлүк баалуулуктарды коргоо жана жашы жете электерге терс таасир тийгизүүчү маалыматтардын жайылышына бөгөт коюу маселелери талкууланды.
Мыктыбек Бектурганов санариптик трансформация шартында балдардын укуктарын коргоо боюнча Кыргызстандын прокуратура органдарынын тажрыйбасы менен бөлүштү. Ал балдардын интернеттеги коопсуздугун камсыз кылууга жана маалыматтык технологиялар аркылуу жасалган кылмыштардын алдын алууга көңүл бурду.
Башкы прокурор санариптик коркунучтарга каршы күрөшүүдө эл аралык кызматташтыкты күчөтүү, маалыматтарды ыкчам алмашуу жана прокуратура органдарынын биргелешкен аракеттерин өнүктүрүү маанилүү экенин белгиледи.
Жыйындын жыйынтыгында катышуучулар Жыйынтыктоочу протоколго кол коюп, Казань декларациясын кабыл алышты.
Мындан тышкары, маалыматтык технологиялар чөйрөсүндөгү кылмыштарга каршы күрөшүү боюнча биргелешкен эксперттик топ түзүү жөнүндө макулдашууга жетишилди.
