Бишкек, 19.11.25. /Кабар/. Жазаларды аткаруу мамлекеттик кызматынын №21 мекемесинин базасында аралыктан добуш берүү үчүн шайлоо тилкеси түзүлдү.
Борбордук шайлоо комиссиясынан билдиришкендей, шайлоо тилкеси мекеменин сунушун эске алуу менен, жарандардын шайлоо укуктарын ишке ашыруу мүмкүнчүлүктөрүн кеңейтүү үчүн шарттарды түзүү максатында түзүлдү.
Шайлоо тилкеси Бишкек шаарындагы Геология чолок көчөсү, 2а дарегинде жайгашкан.
Тиешелүү округдук шайлоо комиссиясына аралыктан добуш берүү боюнча участкалык шайлоо комиссиясынын курамын түзүп, №21 мекеме менен биргеликте шайлоочулар арасында аралыктан добуш берүү боюнча жаңы түзүлгөн шайлоо участогу жөнүндө маалыматтык-түшүндүрүү иштерин жүргүзүү тапшырылды.
Жазаларды аткаруу мамлекеттик кызматынын №21 мекемеси шайлоо комиссиясын жайгаштыруу үчүн жайды бөлүп берүүгө, аны үзгүлтүксүз электр энергиясы, байланыш каражаттары, материалдык-техникалык каражаттар менен камсыз кылууга көмөк көрсөтөт.
Белгилей кетсек, Кыргызстанда Жогорку Кеңештин депутаттарын мөөнөтүнөн мурда шайлоо ушул жылдын 30-ноябрына белгиленген.
