Бишкек, 01.09.25. /Кабар/. Facebook социалдык тармагында шаар тургуну кайрылуу жасап, Бишкектеги Горький көчөсүнүн Панфилов көчөсүнөн Тыныстанов көчөсүнө чейинки бөлүгүндөгү жана Жукеев-Пудовкин көчөсүнүн Медеров көчөсүнөн Горький көчөсүнө чейинки бөлүгүндөгү бузулууларды жоюуну өтүнгөн.
Мэриядан билдиришкендей, шаар мэри Айбек Жунушалиев жерине барып, подрядчы уюмдардын өкүлдөрү менен жолукту.
Горький көчөсүн бойлой Манас проспектисинен 7-апрель көчөсүнө чейин 2024-жылы жол реконструкцияланып, кыска мөөнөттө мыйзам бузууларды жоюу боюнча жеринде тапшырмалар берилген. Подрядчылардын айтымында, жол оңдоо иштеринин мөөнөтү бир жуманы түзөт. Аталган тилкенин так жабылуу күнү кошумча маалымдалат.
Мындан сырткары, 2024-жылы Жукеев-Пудовкин көчөлөрүнүн боюндагы жылуулук тармактары реконструкцияланган. «Бишкекжылуулуктармагы» ишканасына жана подрядчыларга системалуу түрдө мониторинг жүргүзүү жана жолдун жараксыз бөлүгүн алмаштыруу боюнча чараларды көрүү тапшырылды.
