Бишкек, 20.06.25./Кабар/. Мамлекеттик салык кызматы тарабынан ачык эшик күндөрү уюштурулду.
Ведомстводон маалымдашкандай, ага 80ден ашуун студенттер жана жогорку окуу жайлардын окутуучулары катышты.
Иш-чарага Мамлекеттик салык кызматынын төрагасынын орун басары Кубанычбек Ысабеков катышып, салык кызматынын ишмердүүлүгү, негизги милдеттери, өнүгүү багыттары жана санариптештирүү тармагындагы артыкчылыктары тууралуу кеңири маалымат берди.
Салык кызматындагы карьералык мүмкүнчүлүктөргө өзгөчө көңүл бурулду. Студенттерге жумушка орношуу тартиби, керектүү компетенциялар жана кадрларды кабыл алуудагы ачык-айкындуулук принциптери тууралуу маалымат берилди.
Жолугушуу интерактивдүү форматта өтүп, студенттер активдүү катышышты. Иш-чаранын жыйынтыгында интеллектуалдык викторина өткөрүлүп, жеңүүчүлөргө ыраазычылык каттары тапшырылды.
Белгилей кетсек, Ачык эшиктер күнү жаштар арасында салыктык сабаттуулукту жогорулатууга багытталган.
