Бишкек, 24.03.25. /Кабар/. Салык кызматы актуалдуу маселелер боюнча тренингдерди уюштуруп, кызматкерлерин окутууну улантууда. Бул тууралуу ведомстводон маалымдашты.
Программа STI-161 отчетунун формасын толтуруу боюнча жардамчынын жаңыланган функцияларын, ошондой эле салык органдарындагы насаатчылык боюнча сабактарды камтыйт. Катышуучуларга иштин теориялык жана практикалык аспектилери боюнча айтып беришти, анын ичинде:
• салык отчетун толтуруу;
• жаңы кызматкерлер үчүн жеке пландарды жана программаларды түзүү;
• ишкердик этика, коммуникация жана коррупцияга каршы саясат маселелери;
• киреше салыгы жана мамлекеттик камсыздандыруу төгүмдөрү боюнча (STI-161) биргелешкен отчетту толтуруу үчүн жардамчыны колдонуу.
Тренингдердин негизги милдеттери:
1. Насаатчылык. Кызматкерлер тажрыйбалуу адистердин жаңы кызматкерлерге берүүчү билим принциптери менен таанышышты. Бул система кесиптик өсүүгө, жамааттык биримдикке жана натыйжалуу тажрыйба алмашууга өбөлгө түзөт.
2. Жаңыланган STI-161 жардамчысы. Отчетторду толтуруу куралдарынын жаңы функциялары көрсөтүлдү. Жакшыртылган интерфейс каталарды азайтууга жардам берет, ошондой эле отчет берүү процессин тездетет жана салык төлөөчүлөр менен иштөөнүн сапатын жогорулатат.
Катышуучулардын пикири боюнча, мындай тренингдер Салык кызматынын ишинин натыйжалуулугун жогорулатат жана көрсөтүлгөн кызматтардын сапатын жакшыртат.
