Бишкек, 13.10.26. /Кабар/. Нарын жана Ош шаарларында мамлекеттик кызматчылар жана жогорку окуу жайларынын өкүлдөрү үчүн "Жашыл экономиканы баалоо жана пландоо үчүн системалык динамиканын методологиясы" темасында окутуу тренингдери өткөрүлдү. Бул тууралуу Экономика министрлиги билдирет.
Тренингдер Экономика жана коммерция министрлигинин өтүнүчү боюнча Кыргыз экономикалык университетинин Экономикалык моделдөө жана талдоо борбору жана ЕККУнун Бишкектеги Программалык кеңсеси тарабынан уюштурулду.
Окутууга мамлекеттик органдардын жана жогорку окуу жайларынын 62 өкүлү катышты. Катышуучулар системалык динамика, санариптик моделдөө, сценарийлик талдоо жана долбоорлорду баалоо боюнча теориялык билим алып, практикалык көндүмдөрүн өнүктүрүштү.
Тренингдердин негизги максаты — мамлекеттик органдардын аналитикалык потенциалын чыңдоо жана "жашыл" экономиканы өнүктүрүү боюнча чечимдерди кабыл алууда илимий негизделген ыкмаларды колдонууга көмөк көрсөтүү.
Окутуунун жыйынтыгында катышуучулар аналитикалык иштерин коргоп, сертификаттарга ээ болушту.
