Бишкек, 02.06.26. /Кабар/. Саламаттык сактоо министри Дамир Осмонов Баткен облусуна болгон иш сапарынын алкагында аймактагы медициналык мекемелердин абалы жана жаңы курула турган объекттердин долбоорлору менен таанышты.
Ведомстводон маалымдашкандай, алгач министр Кадамжай районундагы Жалпы дарыгерлик практика борборуна барды. Анда учурдагы 25 орундуу төрөт бөлүмү тардык кылгандыктан, анын ордуна 90 орундуу жаңы перинаталдык борбор, ошондой эле жаңы тамак-аш блогун жана өлүккана (морг) имаратын куруу зарылдыгы белгиленди.
Андан кийин Баткен районунда Дүйнөлүк банктын каржылоосу менен АРИСтин долбоорунун алкагында курула турган Оорулардын алдын алуу жана санитардык-эпидемиологиялык көзөмөл борборунун жаңы үч кабаттуу лабораториялык корпусунун эскизи менен таанышты.
Ошондой эле Осмонов Лейлек районунда чек арага жакын жайгашкан Кулунду айылындагы Санитардык-эпидемиологиялык көзөмөл борборунун абалын көрдү. Бул имарат 1964-жылы курулуп, азыр авариялык абалга келген. Учурда борбор убактылуу башка имаратта иштеп, 65 миңден ашуун тургунга кызмат көрсөтүүдө. Министр аталган айылдагы Жалпы дарыгерлик практика борборунун да иши менен таанышты.
Сапардын жыйынтыгында Осмонов Баткендеги медициналык инфраструктураны өнүктүрүү жана материалдык-техникалык базаны чыңдоо маселелери жергиликтүү бийлик менен биргеликте деталдуу түрдө иштелип чыгарын убада кылды.
