Бишкек, 01.09.25. /Кабар/. Өзгөчө кырдаалдар министрлигине караштуу Өрттү көзөмөлдөө кызматынын инспекторлору үчүн өрт коопсуздук эрежелерин комплекстүү камтыган колдонмо китеп басылып чыкты.
Ведомстводон маалымдашкандай, китеп өзгөчө кырдаалдар министри Бообек Ажикеевдин көрсөтмөсү менен кызматкерлердин натыйжалуу иш алып баруусун камсыз кылуу жана Кыргызстанда өрт коопсуздук эрежелеринин аткарылышын туура уюштуруу максатында инспекциялык кызмат иштеп чыккан.
Колдонмо китепте министрлер кабинетинин токтому менен бекитилген өрт коопсуздук эрежелери тууралуу кенен түшүнүктөр, жеке жана юридикалык жактар үчүн колдонулуучу нормативдик укуктук актылар, мамлекеттик, социалдык, коммерциялык имараттардын, турак жайлардын жана башка объектилердин өрт коопсуздугун камсыз кылуудагы негизги өзгөчөлүктөр камтылды.
50 нускама менен даярдалган колдонмо борбордогу жана республикадагы бардык кызматкерлерге берилди. Ал эми кызыккан тараптар министрлер кабинетинин жогоруда көрсөтүлгөн токтому аркылуу да тааныша алышат.
