Бишкек, 01.04.25. /Кабар/. Жалпы коопсуздук жана коомдук тартипти камсыз кылуу максатында Раззаков шаары "Коопсуз шаар" долбоорунун алкагында заманбап видеобайкоо камералары менен камсыздалды.Бул тууралуу Баткен облустук ички иштер башкармалыгынан билдиришти.
Лейлек райондук ички иштер бөлүмүнүн башчысы Кожобек Козубаевдин сунушу менен шаардык кеңештин депутаттары бир добуштан бул демилгенин ишке ашырылышын колдошуп, акча каражатын бөлүп беришкен.
Бул каражатка шаардык мэрия 36 видеобайкоо камераларын сатып алып, Раззаков шаарынын борбордук аянттарына, көчө кесилиштерине жана коомдук жайларына орнотту.
Камералардын иштөө тартиби боюнча атайын мониторинг жүргүзүлдү, алар 24 саат бою онлайн режимде иштейт.
Мындан тышкары, 3 видео камера демөөрчүлөрдүн жардамы менен сатып алынган жана ал базар аймагына орнотулду. Бул иш-чаранын негизги максаты коомдук коопсуздукту жогорулатуу жана мыйзам бузуулардын алдын алуу болуп саналат.
Бүгүн Лейлек райондук мамлекеттик администрациясынын башчысы Канымет Осмонбеков жана Раззаков шаарынын мэри Адилбек Жоробаев жеринде иштин жүрүшү менен таанышып, видео байкоо камераларынын иштөө тартибин текшеришти.
Алар жергиликтүү бийлик жана милиция кызматкерлери менен биргеликте коомдук тартипти камсыз кылуу үчүн күч-аракеттерин жумшап, коопсуздукту камсыз кылууну уланта тургандыктарын белгилешти.
