Бишкек, 27.10.26. /Кабар/. Президент Садыр Жапаров жарандардын кайрылуулары менен иштөөдө жана эл менен натыйжалуу диалог түзүүдө үлгү көрсөтүүдө. Бул тууралуу Жогорку Кеңештин депутаты Бекмурза Эргешов "Кабар" агенттигине билдирди.
Анын айтымында, мамлекет башчысынын аймак эли менен жолугушуулары жергиликтүү бийлик өзгөчө көңүл бурушу керек болгон көптөгөн көйгөйлөрдү ачыкка чыгарды. Депутат облустардын жетекчилери да ушундай эле деңгээлде жарандарды өз алдынча кабыл алып, алардын маселелерин жеринде чечүүгө аракет кылышы керектигин белгиледи.
"Бүгүнкү күндө бардык деңгээлдеги мамлекеттик кызматкерлер дагы, президенттин бардык өкүлдөрү дагы бир команда болуп иштеши керек. Эгер жалпы команда президент менен бирге ушундай жоопкерчилик жана берилгендик менен иштесе, бардык тармактарда тартип орнойт. Президент иш жүзүндө эл менен иштөө кандай болушу керектигин көрсөтүп жатат", - деди Эргешов.
Депутаттын белгилешинче, райондук жана облустук жетекчилер жергиликтүү көйгөйлөрдү ыкчам чечүү үчүн зарыл ыйгарым укуктарга ээ. Ал эми республикалык деңгээлдеги маселелерди президент менен үзгүлтүксүз жолугушуулардын жүрүшүндө натыйжалуу чечүүгө болот.
Эргешов эл өкүлдөрүнө да жарандардан көптөгөн кайрылуулар түшөрүн кошумчалады. Алардын басымдуу бөлүгү күнүмдүк турмуштагы көйгөйлөргө, жолдордун абалына жана айылдарды өнүктүрүүгө байланыштуу. Депутаттар бул маселелерди тиешелүү министрликтерге, сот тутумуна, прокуратурага, Ички иштер министрлигине жана башка мамлекеттик органдарга жөнөтүшөт.
"Президенттин жарандар менен түз жолугушуу тажрыйбасы жергиликтүү көйгөйлөрдү өз убагында чечүүгө жана мамлекеттик органдардын жоопкерчилигин күчөтүүгө өбөлгө түзөт", - деди депутат.
