Бишкек, 27.10.26. /Кабар/. 2026-жылдын үлгүсүндөгү 20 жана 50 сомдук банкноттор жасалмалоодон коргоочу бир катар белгилер менен жабдылган.
Улуттук банктан билдиришкендей, алардын жардамы менен банкноттордун аныктыгын текшерүүгө болот. Негизги коргоо белгилерине төмөнкүлөр кирет:
- суу белгиси – көп өңдүү портрет жана номиналды билдирген электротип;
- коргоо тилкеси – жарыкка кармаганда үзгүлтүксүз көрүнүп, анда номиналдын саны жана Улуттук банктын ромб түрүндөгү логотиби чагылдырылат;
- дал келген сүрөттөр – банкноттун эки бетиндеги сүрөттөр жарыкка кармаганда ромб формасын түзөт;
- рельефтүү сүрөттөр – портрет, жазуулар жана номинал атайын бедер менен берилген;
- көмүскө сүрөт – банкнотту жантайтып кароодо сомдун белгиси көп түстө көрүнөт;
- жалтырак элементтер – арткы бетинде номинал жана Улуттук банктын логотиби чагылдырылган;
- микротекст жана микросүрөттөр – флора менен фаунанын сүрөттөрү майда элементтер аркылуу берилген.
