Бишкек, 07.08.26. /Кабар/. Археологдор Польшанын Гданьск шаарынын борборунан дээрлик 900 жылдык тарыхы бар жыгач чиркөөнүн калдыктарын табышты, деп Казинформ Euronews агенттигине шилтеме берип билдирди.
Маалыматка ылайык, бул ачылыш көчөнүн жанындагы казуу иштери учурунда аныкталган. Алдын ала эсептөөлөр боюнча, чиркөө 1140-жылдары курулган. Эгерде бул дата тастыкталса, ал Польшада табылган ушул типтеги эң эски жыгач чиркөө болот.
Чиркөөнүн фрагменттеринен тышкары, археологдор жыгач турак жай имараттарынын жана орто кылымдагы көрүстөндүн калдыктарын табышкан.
Изилдөөчүлөрдүн айтымында, чиркөөнүн курулушунун айрым элементтери 1,5 метрге чейин бийиктикте сакталып калган, бирок курулуштун олуттуу бөлүгү жакын жердеги көчөнүн астында көмүлгөн.
Гданьск бийлиги сакталып калган курулуштарды жана аларды курчап турган тарыхый катмарды сактап, коомчулукка көрсөтүү мүмкүнчүлүгүн карап жатат.
Мурдагы балмуздак саткан жайдын ордунда археологиялык изилдөөлөр 2023-жылдан бери уланып келет. Ал жерден орто кылымдагы мүрзөлөр жана 13-кылымдагы таш мүрзөлөр табылган, бирок жыгач чиркөөнүн табылышы казуу иштеринин эң маанилүүлөрүнүн бири болгон.
