Бишкек, 03.09.25. /Кабар/. Бишкек-Кайыңды каттамындагы поездди таш менен урган бейбаштык факты аныкталды. Бул тууралуу Чүй облусттук ички иштер башкы башкармалыгынан билдиришти.
Маалыматка ылайык, 31-августта белгисиз адамдар тарабынан Бишкек–Кайыңды багытында бара жаткан жүргүнчү поездине таш ыргытып, анын айнеги талкаланган. Окуя Жайыл районунун аймагында катталган.
Бул факты боюнча Жайыл райондук ички иштер бөлүмүндө иликтөө иштери жүргүзүлүп, ыкчам-иликтөө аракеттеринин жүрүшүндө милиция кызматкерлери күбөлөрдөн көрсөтмөлөрдү алып, аймактагы видео байкоо камераларынын жазууларын талдашкан.
Натыйжада окуяга тиешеси бар үч жашы жете элек бала – 2011, 2014 жана 2015-жылы туулган өспүрүмдөр экени аныкталды. Алар Жайыл районунун тургундары экендиги маалым болду.
Балдар Кыргыз Республикасынын мыйзамдарына ылайык жоопкерчиликке тартуу курагына жете элек болгондуктан, милиция тарабынан алардын жана ата-энелеринин катышуусунда түшүндүрүү иштери жүргүзүлүп, эскертүүлөр берилди. Ошондой эле, өспүрүмдөрдүн ата-энелерине карата КРнын “Укук бузуулар жөнүндө” кодексинин негизинде административдик протоколдор түзүлөт.
