Бишкек, 21.03.26 /Кабар/. Бүгүн, 21-мартта Жогорку Кеңештин төрагасы Марлен Маматалиев Нооруз майрамына карата Ош шаарында уюштурулган салтанатка катышты.
Парламенттен билдиришкендей, алгач төрага улустун уулу күнүндө жасалган сүмөлөктү ачуу аземине күбө болуп, ак элечекчен энелердин колунан даам сызды.
Андан соң борбордук аянттагы элди Нооруз майрамы менен куттуктап, сөз сүйлөдү.
Байыртан ата-бабаларыбыз күн менен түн теӊелген бул күндү жаӊы жылдын башталышы катары майрамдап келишкенин белгилеген Марлен Маматалиев: “Терең мааниге ээ, символикалуу жөрөлгөлөр менен коштолгон бул майрам табияттын өлбөстүгүн, жашоонун түбөлүктүүлүгүн даңазалайт”, – деди.
Ошону менен катар төрага Ош – үч миң жылдан ашуун тарыхы бар, Кыргызстандын эң байыркы шаарларынын бири экенин баса белгиледи.
Мындан тышкары, быйылкы Нооруз Орозо айт майрамына удаалаш белгиленип жаткандыгын жакшы жышаан катары баалаган төрага: “Орозо руханий тазаланууга багытталган ыйык парздардын бири болсо, Нооруз жалпыбызды жаңыланууга чакырган өзгөчө майрамдардын бири. Андыктан баарыбыздын кармаган Орозобуз кабыл болуп, Жаратканыбыз ар бир бата-дубаларды орундатсын”, – деп кошумчалады.
Майрамдык салтанат байыркы маданиятты, руханий баалуулуктарды чагылдырган атайын программа менен коштолуп, төрага баштаган Жогорку Кеңештин депутаттары улуттук оюндарга да күбө болушту.
